Ассаламу Iалайкум! Крабовый палочкаш яа мегий бусалбашна?

БисмиллахIиррохьманиррохьим

Ва Iалайкум ассалам ва рохьматуллахIи ва баракатухI!

Нагахь санна «крабовый палочкаш» кхузахь а, кхузахь а ма-йийццара елахь, уьш кечйеш царна тIедеттачу молханаша зен деш а дацахь…

Кра́баш яа магар Iелам-нахана юкъахь къовсаме хIума ду, юкъарчу чулацамца аьлча хьанафий а, шафиIий а мазхIабехь мегаш дац иза, маликий а, хьанбалий а мазхIабехь мегаш ду.

Ткъа оцу «крабовый палочкаш» юкъахь кра́бийн жижиг дан а дац, иза дерриге чIе́ран жижиг ду. Бакъду, «крабовый экстракт» ю бах цара цунах тухуш, «ароматизатор» а олу цара цунах. И экстракт цхьаболчара крабийн «панцирах» йоккху боху, цхьаболчара цуьнан меттана кхи бахьанаш леладо боху. Ткъа и экстракт яккхаран некъ мел лехарх суна ца карийра, делахь а маликий а, хьанбалий мазхIабехь долчунна тIедоьгIна аьлча яа мегаш хуьлу иза а.

ТIаккха, Е120 цIе йолу бос бен молха а ду боху цара оцу «палочкех» тухуш. И молха са долчу хIуманех доккхуш ду а боху. Ткъа иза цхьаболчу Iелам-наха ца магадо, хIунда аьлча иза наджас ло́ру дела. Делахь а, хьалхалера дукхах болчу Iелам-наха, наджас йолу хIума хийца а елла, кхечу хIуманга йирзича, иза цIанйелла лору. Цу тIе а доьгIна таханлера дуккха а Iелам-наха а, фатван гуламаша а мегаш ду олу юург ларйеш, йа цунна бос беш, йа кхидолчу бахьанашна юучух тухуш долу и молханаш юкъахь долу даарш даар, уьш зене ца хилчахьана.

Ас айса юучух тохуьйтуш лелайойту уьш наггахь, делахь а йа «хIаъ», йа «хIан-хIа» аьлла кхечарна жоп дала хала ду суна, цундела, лераме йиша дехар ду хьоьга иза кхечу Iелам-стаге хаттар.

Ткъа дика хуург сийлахь АллахI ву!

11.08.2009