Хаттар:

Ассаламу Iалайкум! Сан цхьа хаттар ду: ирахь волуш хи мала а, яахIума яа а мегий?

Жоп:

БисмиллахI, алхьамдулиллахI, вассолату вассаламу Iала росулиллахI!

Ва Iалайкум ассалам ва рохьматуллахIи ва баракатухI!

Ирахь волуш хи маларх а, яахIума яарх а лаьцна даьхкина тайп-тайпана хьадисаш ду. Цхьадолчу хьадисашкахь магош дац ирахь волуш хи малар, иштта хи меллачо иза хьаIеттадойла аьлла деана а ду. Иштта и хьадис дийцинчул тIаьхьа, ирахь яахIума яарх лаьцна шега хаьттича, и хьадис дийцина волчу асхьаба, «иза кхин а вон ду» - аьлла хилла а ду. Ткъа кхечу хьадисашкахь деана ду, Пайхамара (Делера салават а, салам а хуьлда цунна) ирахь волуш хи мелира аьлла. Дуккха асхьабашна а ирахь волуш хи малар вон хIума хеташ ца хиллера аьлла деана ду, цара шаьш иштта молуш хиллера аьлла деана ду.

Ткъа и шинне кепара дийцина долу хьадисаш нийса ду, Имам Ан-Нававийс (Дала къинхетам бойла цунах) ма-аллара.[1] ТIаккха, цхьана хьадисашкахь и хIума ма де бохуш хилча, вукху хьадисашкахь и хIума дан мегаш хилар дуьйцуш хилча, дуккха асхьабаша а иза дина хилла а хилча, «Усулул-фикъхI» (ФикъхIан Баххаш) Iилмангахь сецна ма-хиллара, Iеламнаха и хьадисаш цхьаьнатухуш, церан юкъара маьIна доккхуш аьлла: ца магош долчу хьадисаша гойтуш дерг – ирахь хи малар а, яахIума яар а дика ца хилар ду, магош долчу хьадисаша гойтуш дерг – и хIума дар хьарам ца хилар ду, иза къилахь хIума ца хилар ду, цхьа хьашт делахь иза дан мегаш хилар ду.[2]

Цигара схьа девза вайна, ирахь хIума малар а, юург яар а хьарам хIума ца хилар, иза къилахь ца хилар, цхьа хьашт делахь иштта хIума яа а, мала а мегаш хилар, делахь а гIолий дерг а, мелехь дерг а охьахиъна яар а, малар а хилар.

Ткъа дика хуург сийлахь АллахI ву!

2010-08-04 = ‏23‏/08‏/1431