Тоба деш юххехь цхьаъа хила вези тоьшаллийна?

БисмиллахIиррохьманиррохьим

Тоба дечу хенахь юххехь цхьаъа оьшуш вац, йа уллохь теш хилар тоба нийса хиларан биллам а бац. Биллам бац бохург – и ца хилча а тоба дар нийса хуьлу бохург ду.

Шейх Ибн Бáзе – Дала къинхетам бойла цунах – хаьттина хилла:

«Тоба дечу хенахь биллам буй, шахIадат нахана хаза а хезаш далор?». Цо иштта жоп делла цунна: «Массарна хезаш шахIадат далор биллам бац. Тоба дар хир ду айхьа керстадеш (духатухуш) хилларг тIелацарца а, айхьа ца деш Iаддитина хилларг дан дIадолорца а».[1]

Делан лайно шегара даьллачунна тоба дар АллахIана а, цунна а юкъахь йолчу уьйранца доьзна ду, цу юкъагIерта хьашт дац цхьа а. Бусалба динехь, стаг ша дохко а ваьлла, АллахIе шена гечдар дехчахьана, АллахI-Дала Ша гечдеш ду цунна цуьнан къинош, керста-нехан санна мозгIарша гечдеш дац.

Бакъду, цхьайолчу хенахь, теш а волуш дан дезаш хила тарло тоба. Масала, нехан хьакъ галдаккхарна тоба деш делахь, и хьакъ, долчарна юхадерзо деза. Иза юхадерзош уллохь теш хилча дика хила мега цхьайолчу хенахь, делахь а иза билламе дац.

Цхьадолчу хьолашкахь, бусалба нехан паччахьо, йа къедано, йа церан метта волчо тIедожо мега, тоба дечу хенахь уллохь тешаш хилар. Масала, цхьана заманахь, керста-махкахь керста зударий балорхьама цхьана бусалба кегийчу наха килсан чохь керста-дин тIелоцу шаьш аьлла даре дина хилла. И хIума дарца, уьш бусалба динах юхабевлла лору шариIато. ТIаккха, шаьш динчунна дохко а бевлла, бусалба дине юхаберза лиъна царна, шариIатехь ма-дарра шайн зударшца мах а беш. Цаьрца дан дезарг дуьйцуш, Ал-АзхIаран Шейх хилла волчу Iелам-стага Джáдул-Хьаккъ Iалий Джáдул-Хьаккъа иштта жоп делла, церах лаьцна шега хаттар дина волчу пачхьалкхан векална:

«… Шаьш тоба дар гIарадоккхур ду цара, официал даре дарца, цигахь волчу Миср пачхьалкхан векална хьалха. Цкъа доьххьара цаьрга шайн маттаца схьа а алийтина, тIаккха тоьшаллин кехат тIехь дIаяздийр ду, шаьш динчунна а, шаьш аьллачунна а цара тоба а дина, уьш АллахIе а бирзина аьлла; цара тешалла а до аьлла, АллахI воцург кхин дела а вац, Мухьаммад – Делера салават а, салам а хуьлда цунна – АллахIа массо нахана ваийтина Цуьнан элча а ву аьлла; уьш дIакъаьсташ а бу аьлла, Исламана доьхьала долчу дерриге динех; сийлахь-цIена волчу АллахIе цара гечдар а доьху аьлла, Исламан кхетамна а, цуьнан шариIатна а доьхьал долчу шайгара даьллачу хIора дашна а, балхана а».[2]

Ткъа дика хуург АллахI ву!

07.09.2008