|
|
|
Ассаламу
Iалайкум!
Лачкъийна хIума чIогIа йорах хуьлу кхузахь. И хIума иэца мегар дуй, туькнара
иэца ницкъ кхочуш бацахь?
БисмиллахIиррохьманиррохьим Ва Iалайкум ассалам ва рохьматуллахIи ва баракатухI! Ша оьцуш йолу хIума лачкъийна юй а хууш иза иэцар мегаш дац, башхула яц, и хIума бусалба нехан лачкъийна елахь а, йа керста нехан лачкъийна елахь а. Иза мегаш ца хиларан тешаллаш а, баххаш хIорш ду: 1) Лачкъийна хIума иэцарца и хIума лачкъош волчунна гIо хуьлу, иза шен хьарам балха тIехь кхин а чIагIвар хуьлу, цуьнан юха а хIума лачкъо дог доуьйту. Ткъа, хьарам хIуманна жимма а гIо дар хьарам ду, стаг вуьйчу хенахь гIо дар санна, хIума лачкъош гIо дар санна, иштта дI. кх. Лекха хинволчу АллахIа аьлла: ×Аш вовший гIо де дикаллийна а, Делах кхерарна а тIехь. Аш вовший гIо ма де къиношна а, мостагIаллийна а тIехьØ.[1] Цу айатехь АллахIа ца магийна вон хIума деш волчунна цхьанне а агIор гIо дар, цу юкъа догIу лачкъийна хIума иэцар а. И маьIна долуш деана ду хIара хьадис: «Iесаллийна тIехь цхьанна гIо динарг – цхьана дешан декъаца бен иза дацахь а – оцу Iесаллехь цуьнан накъост ву».[2] 2) Делан Элчано – Делера салават а, салам а хуьлда цунна – аьлла: "Шена лачкъийна юй хуъушехь лачкъийна хIума иэцнарг - иза лачкъийнчуьнца цхьаьна къа а ду цунна, эхь а, юьхьIаржо а ю цунна".[3] 3) Ибн Аби ШайбахI цIе йолчу хьадисан Iелам-стага – Дала къинхетам бойла цунах – дийцина шен "Ал-Мусаннаф" жайни тIехь, Хьасан Ал-Басрийс – Дала къинхетам бойла цунах – аьлларг: "Хьо Мединатан базара кхаьчча, ахь иэца цигахь хьайна карийнарг; ахь ма иэца лачкъийна юй а, тешнабехкаца яьккхина юй а хьайна хиъна йолу хIума". Кхин а дийцина цо, Ибн Сирина – Дала къинхетам бойла цунах – аьлларг: "Ас элира Iабидате: "Лачкъийна юй сайна хууш йолу хIума иэца мегар дуй ас?" Цо элира: "Дац". Ас элира: "Тешнабехкаца яьккхина юй сайна хууш йолу хIума иэца мегар дуй ас?" Цо элира: "Дац". 4) Iелам-нехан барт хилла хIума ду, лачкъийна хIума иэца мегаш ца хилар.
[1] Сурат "Алмаидат" 2 айат. [2] Хьáкима дийцина «Ал-Мустадрак» жайни тIехь, иштта хьадис: «Зулам-дай а, церан гIоьнчий а цIергахь бу». Хьáкима аьлла: «ХIара нийса хьадис ду». И маьIна долуш кхин а хьадисаш ду даьхкина, «Муснад АррабúI» тIехь а, «Алфирдавс» тIехь а. Ибн Мáджас а, БайхIакъúс а, РабúIас а, Абу ЙаIлáс а, Дайламúс а дийцина иштта хьадис: «Бусалба стаг вуьйш цхьана дешан декъаца дина а гIо динарг къемат дийнахь Далла дуьхьал гIур ву, шен хьаж тIехь яздина: - «Делан къинхетамах догдиллина стаг ву хIара» - аьлла а долуш». [3] Хьаким, БайхIакъий, "Ал-Мусаннаф" Ибн Аби ШайбахI.
|