Ассаламу Iалайкум! Керла дине веанчун шен керста гергарчарна /дена нанна/ дан шафаIат хир ду олуш хезнера суна, и мел бух болуш хIума ду техьа?

БисмиллахIиррохьманиррохьим

Ва Iалайкум ассалам ва рохьматуллахIи ва баракатухI!  

И хIума суна хезна дац, йа цунна тешалла ларалур болу бух гина а бац, талларх, лахарх гина дац суна цунна тешалла.

 ХIокху хаттаран цхьадолу маьIна долуш – бусалба стага керста стагана шафаIат дарх – деана хьадис ду, Бухарис а, Муслима а дийцина, Абу ТIолибах лаьцна. Iабдул-МуттIолибан кIанта Ал-Iаббáсера – Дела реза хуьлда цунна – схьадеана, цо Пайхамаре – Делера салават а, салам а хуьлда цунна – хаьттинера аьлла: «ХIай Делан Элча! Абу ТIолибана цхьанне агIор пайда биний ахь (эхартахь), бакъдолуш иза хьо лар а веш, хьан доьхьа оьгIаз а воьдуш хилла вара-кх?» Цо аьлла тIаккха: «ХIаъ! Иза коган хьорканаш тIекхаччалц цIергахь ву, со ца хиллехьара (жоьжахатехь) цIеран уггар бухарчу меттехь хир вара иза». [Бухари, Муслим]. Абу СаIид Ал-Худрийс – Дела реза хуьлда цунна – дийцина, Делан Элчано – Делера салават а, салам а хуьлда цунна – шена гергахь шен деваша Абу ТIолиб хьахийча элира аьлла: «Къемат дийнахь сан шафаIато пайда бан мега цунна – цуьнан когийн шина хьоркана тIекхочуш йолчу цIерга вуьллур ву иза, оцу цIарах цуьнан коьртан хье хир бу кхехкаш». [Бухари, Муслим].

 Бусалба стага керста стагана шафаIат дарх лаьцна Iелам-наха билгал дина, иштта шафаIат цхьанна а дан йиш яц аьлла, АллахIа иза къобал дийр а дац аьлла, оцу шен девешина Пайхамара – Делера салават а, салам а хуьлда цунна – дийр долу шафаIат къаьсттина цунна бен дац аьлла.

 - Лакхахь долу шолгIа хьадисан маьIна деш, Имам Ибн Хьаджар Ал-Iаскъолáнийс – Дала къинхетам бойла цунах – аьлла: «Абу ТIолибана хилла болу и пайда цунна цхьанна бен хир болуш бац, иза цунна хиларан бахьана Пайхамаран – Делера салават а, салам а хуьлда цунна – беркат ду».[1] Цуьнан дашо гойту и шафаIат а, керста стагана иштта пайда хилар а цхьана Абу ТIолибана бен хирг ца хилар.

- Имам ТIахьáвийс – Дала къинхетам бойла цунах – яздинчу Iакъидатан жайнина маьIна деш, таханлерачу Iелам-стага Сафар Ал-Хьавáлийс бах: «Мушрикана (кафирна) шафаIатах цхьа а дакъа хир дац, тIаьхьо вай дуьйцур долу Абу ТIолибана хир доцург – иза къаьсттина цунна хир долуш ду».[2]

- Имам ТIахьавийн – Дала къинхетам бойла цунах – уьзза жайни тIехь, шафаIатана дакъош дуьйцучу хенахь цо аьлла: «ЯлхолгIа дакъа: Iазап хила хьакъ хиллачунна тIера Iазап лахдар доьхуш шафаIат дар, цо (Пайхамара – Делера салават а, салам а хуьлда цунна – ) шен девешина Абу ТIóлибана Iазап дайдар доьхуш дийр долу шафаIат санна». Оцу дешнийн маьIна деш, Шейх Сафар Ал-Хьавáлийс масийтта агIор чIагIдеш билгалдина, керста стагана бусалба стага шафаIат дар къаьсттина Абу ТIалибана цхьана Пайхамара – Делера салават а, салам а хуьлда цунна – бен кхечуьнан бакъо хирг ца хилар. Цо тешалла далийна, АллахIа Ша реза волчунна бен шафаIат дойтур дац аьлла долу айат а, керста-нахана гечдар деха мегаш ца хилар а, иштта кхидолу баххаш а. Цо аьллачух цхьадерг иштта ду: «Цхьане а адамо шафаIат дийр дац шен гергарчу мушрикана (керстанна)».[3]

- Шейх Солихь Ал Аш-Шайха бах, шафаIат дечу хенахь АллахIа пурба даларан маьIна деш: «ШафаIат дарехь пурба даларан маьIнах ду – иза цIена хилар, ширках цIена хилар а, шена шафаIат дийриг ширкан охIлунах ца хилар а. Цу юкъара къастийна ву цхьа Абу ТIолиб, Пайхамара – Делера салават а, салам а хуьлда цунна – цунна шафаIат дийр ду Iазап дайде аьлла. И шафаIат жоьжахатера араваккхарца пайда беш дац, Iазап лахдар бен дац иза, иза къаьсттина Пайхамарах – Делера салават а, салам а хуьлда цунна – доьзна ду (кхечо дийр доцуш), лекха хинволчу АллахIа цунна Шегара делла иза, цунна пурба а делла цо цуьнца».[4]

- Ас айса дешна дац, делахь а Шейх Ибн Ал-Iусаймина а – Дала къинхетам бойла цунах – уьзза маьIна долу дешнаш аьлла элира соьга.

Ткъа дика хууш верг АллахI ву!