Хаттар:

Ассаламу Iалайкум! СагIа, шен гергара воцуш, просто вевзаш волчу стагана тIера даьккхича, веллачунна тIера, дIакхочий иза?

Жоп:

БисмиллахI, алхьамдулиллахI, вассолату вассаламу Iала росулиллахI!

Ва Iалайкум ассалам ва рохьматуллахIи ва баракатухI!

СагIа, гергара волчунна тIера даьккхича а, гергара воцучунна тIера даьккхича а, оцу веллачунна дIакхочу, Дала мукъа лахь.

Имам Нававийс – Дала къинхетам бойла цунах – аьлла: «Ровдатут-ТIóлибúн» тIехь: «Амма веллачунна доIа дар а, цунна тIера сагIа даккхар а – цаьршимма цунна пайда бо, цу тIехь цхьа а къовсам бац. (Веллачунна) доIа дар тIехь а, (цунна тIера) сагIа далар тIехь а цхьатера ву верас а (веллачух ирс оьцуш волу гергарниг а), гергара воцург а».

СаIуди пачхьалкхера Гуттаренна а болчу Фатван Гуламо а боху уьзза: «Амма сагIа далар – иза дала мегаш ду бусалба стагана тIера, цуьнан гергарачара а, уьш боцучара а, шайна луъучу хенахь».[1]

Шейх ВахIбат аз-Зухьайлийс боху, ша цхьанна сагIа лучу хенахь «массо бусалба нахана тIера» аьлла ниййат дар дика хилар дуьйцуш: «Ша́ ме́лана луш долчу сагIийна «массо бусалба божаршна а, зударшна а тIера ло» аьлла ниййат дар гIолий ду, хIунда аьлча иза царна дIакхочуш долу дела, сагIа луш волчуьнан ме́лана хуьлуш иэшам а боцуш». Цу дешнашна билгалдаккхар дина Шейх ВахIбата, хьанафийн мазхIабера Iеламнаха яздинчу жайнашна.[2]

Цу дешнашкара схьа девза вайна, сагIа гергара воцучунна тIера а дала мегаш хилар а, деллачунна а, шена тIера луш волчунна а цунах ме́л хуьлуш хилар а.

Ткъа, веллачунна тIера сагIа даларх лаьцна вай дийцира хьалха кхузахь:

Веллачунна тIера сагIа далар.

КIанта шен дена тIера бежан йийна сагIийна дIаекъча, цунна хила пайда буй цунах?

Дика хуург сийлахь АллахI ву!

29.10.2010 = ‏1431‏-11‏-21