Хаттар:

Ассаламу Iалайкум! Дала беркате бойла вайна хIара мархин бутт, Дала диканца бекхам бойла хьуна Олхазар.
Сан хаттар дара, марха а долуш море тIехь лийча мегий? Цунах лаьцна ахь жиммал кхетам белча АллахIан йал а хир йар хьуна, тхоьгара баркалла а хир дара хьуна. Дала аьтто бойла хьан.

Жоп:

БисмиллахIир-рохьманир-рохьим

Ва Iалайкум ассалам ва рохьматуллахIи ва баракатухI!

Марха кхобург хIурда (море) чохь, йа Iома чохь, йа муьлхха а гулделла лаьттачу хи чохь лийчар шина кепара хила йиш ю: легашка а, лергийн кIоргене а хи кхача йиш йолчу кепара лийчар, йа иштта и хи кхочур доцучу кепара лийчар.

Легашка а, лергийн кIоргене а хи кхочур доцучу кепара лийчар мегаш ду, иштта лийчича марха доха а ца духу. Масала, корта хи буха а ца бохуьйтуш луьйчур велахь, йа нека дечу хенахь лергашка а, бага а, мера чу а хи эккхарх ларлуш  дикка нека дан хууш велахь.

Ткъа, марха кхобуш верг шен легашка а, лергийн кIоргене а хи кхача тарлуш долчу кепара лийчар Iаддитича гIолий ду аьлла цхьаболчу Iелам-наха, хIунда аьлча марха оцу шина метте хи кхачарца марха дохаран кхерам болу дела.[1] Вукху Iелам-наха доьххьарниг санна мегаш ду аьлла иза, оцу шина метте хи кхачийтарх ларвелчахьана.[2]

Бакъду, нагахь санна марха кхобучунна хууш делахь, ша́ хIурда тIехь луьйчучу хенахь шен легашка а, лергийн кIоргене а хи кхочуш хилар, тIаккха цунна ша́ цунах ларвалалур волуш вацахь, йа иштта хи кхочур ду аьлла цунна хеташ делахь, тIаккха хьарам хуьлу цунна иштта лийчар, Имам Ал-АзруIийс ма-аллара, Дала къинхетам бойла цунах.[3]

Дика хуург сийлахь АллахI ву!

09/14/2009