|
|
| Видео |
|
БисмиллахIиррохьманиррохьим Ва Iалайкум ассалам ва рохьматуллахIи ва баракатухI! Лераме йиша! Ахь хоьттучу хаттарх лаьцна Iелам-наха аьлларг лехча, суна карийнарг кхаа кепара делла жоп дара. 1. Цхьаболчу Iелам-наха мегар ду аьлла лергана цхьаннал сов Iуьрг даккха, нагахь санна хазаллийна лерга хIума олла доккхуш делахь. ХIунда аьлча цхьаъ даккха мегаш хилча цул сов даккха а мегаш хуьлу дела, цхьаъ даккхарна а, шиъ даккхарна а юкъахь цхьаъа башхалла йоцу дела, шиъ даккха мегар дац аьлла деана къаьсттина далил доцу дела. Кхерах цхьаболчара, нагахь санна цхьаннал сов Iуьрг доккхуш лелаш Iадат делахь мегар ду а аьлла. 2. Цхьаболчу Iелам-наха лергана цхьаннал сов Iуьрг даккха мегар дац аьлла, хIунда аьлча цхьаннал сов Iуьрг даккхарехь хьашт доцу дела, цо йоI лаза а йо дела, иза керста-нахах а, боьха нахах а тарйалар а долу дела, шарIехь мегаш дерг цхьа Iуьрг даккхар хилча, цул совнаха дерг даккха магорна къаьсттина далил оьшу дела. 3. Цхьаболчу Iелам-наха иза дика дац аьлла. И бохург – хьарам дац иза, делахь а ца дича дика ду бохург ду. Иштта аьллачерах ву Шейх IабдуллахI Ал-Джибри́н, Дала къинхетам бойла цунах. Шега иштта хIара хаттар дича: «Зудчо шен шина лергана шозза йа кхозза Iуьрг даккха мегар дуй?» - цо иштта жоп делла: «Цуьнан шина лергана цхьацца Iуьрг дакхха мегар ду, лерга ухкуш йолу дети йа деши чIагарш тIеохкархьама. Дика лоруш дац лергана ши Iуьрг даккхар, йа кхин а сов даккхар, хIунда аьлча иза мегаш доцу эрна чевнаш йар а, лазам бар а ду, цунах пайда а бац».[1] Цуьнан дашах мелла а тера ду Шейх Ибн Ал-Iусайми́на – Дала къинхетам бойла цунах – шега цхьана лерга тIе масех чIуг оллархьама масех Iуьрг даккхарх лаьцна хаттар дича аьлларг: «Зудчо ша ехачу меттехь кхечу зударша уллучул совнаха (Iадатехь долчул совнах) лерга хIума оллар исраф (эрна даьхни дайъар, дозанал сов ялар) хиларх кхоьру со. Лекха хинволчу АллахIа аьлла ду: [Аш яа а юийла, мала а молийла, исраф а ма дойла, бакъдолуш АллахIана ца бе́за исраф дийриш].[2] Ткъа нагахь санна зудчо цхьана лергана ши Iуьрг доккхуш хIоьттина лелаш Iадат делахь – тIаккха вон хIумма а дац (даккха мегар ду ши Iуьрг тIаккха). Амма нагахь санна иштта лелаш Iадат дацахь – тIаккха иза вон лоруш долу исраф дар хуьлу. Цул совнаха, адамаш тIаккха цу балха тIехь вовший дозаллаш-кураллаш йарца къийсадала кхерам а бу, хIокху шарахь ши Iуьрг доккхур ду, шолгIачу шарахь кхоъ, тIаккха диъ.., иштта дерриге лерг Iуьргех дузур ду. И хIума хир дац олийла дац, хIунда аьлча зударша вовшашкара хIуманаш схьаоьцу дела».[3] Иштта дара Iелам-наха цу хаттар хьокъехь аьлларг. Ткъа цу кхааннах гIолий хе́тарг иштта ду: лергана шолгIа Iуьрг ца доккхуш Iаддитича дика хила тарло, делахь а даккхар хьарам ца хила тарло, къилахь а ца хила тарло, керста-зударех тарйала ниййат долуш доккхуш ца хилчахьана. Дика хуург силайхь АллахI ву! 15.07.2009 [1] Шейх IабдуллахI ибн Iабдуррахьман Ал-Джибри́н, «Фата́ва́ Ибн Джибри́н», фатва № 2887. [2] Сурат «Ал-АIро́ф», 31 айат. [3] Шейх Ибн Ал-Iусайми́н, «Ал-Ликъо́ъ аш-ШахIрий», № 45, 3/172.
|