Ассаламу Iалайкум! Вай цIахь олуш цхьа хIума ду-кх, «хьам баьккхина суна» олий (веллачу стага). Иза муха ду вайн бусалба динчохь?

Ассаламу Iалайкум! Хьам баккхар хIун ду? Хьам – иза веллачу стага дина волчу стагана хаам бар, я Iазап дар ду бах цхьа болчара. Масала, корт лаз балар, я дегI дика доцуш хилар. ШариIатехь хIуммаъ дуй цунах лаьцна. Дела реза хуьлда жоп деллачунна.

БисмиллахIиррохьманиррохьим

Ва Iалайкум ассалам ва рохьматуллахIи ва баракатухI!  

ШолгIачу хаттарехь ма-довзийттара, и хIума олуш хезначу нахе хаьттича, «хьам баккхар» бохучуьнан жамI а, маьIна а - веллачу стага дийначунна Iаткъам бар ду. Нагахь санна цуьнан маьIна а, жамI а и делахь - бусалба динехь цхьа а тоьшалла долуш хIума дац иза, йа динера цхьа а бух болуш кхетам а бац иза. Иштта хилла ца Iаш, харц кхетам а, мегаш боцу кхетам а хила а тарло иза. Масала, цхьацца нах бу, беллачу дикачу наха дуьне леладо бохуш, малх-бутт а лелабо бохуш, стигал-латта а леладо бохуш, йокхуна-йочуна а хуьлуьйту бохуш, баккъалла а цунах теша а тешаш. Ткъа иштта болу кхетам – АллахIан бен хила йиш а йоцу, хила хьакъ а доцу гIуллакхаш а, белхаш а Цо кхоьллинчу нехан керахь ду моттар ду, АллахIан паччахьаллин декъах цхьа дакъа цу нахана далар ду. Беллачу наха лелош дац и гIуллакхаш, йа церан керахь а дац и белхаш. АллахIа Ша Шен керахь ду бах уьш.

(Ахь ала (хIай Мухьаммад): мила ву шуна рицкъ луш верг стиглара а, лаьттара а? Йа хазар а, бIаьрса а хьена керахь ду? Йа еллачу хIумнах дийнаниг кхуллуш верг а, дийначух елла хIума еш верг а мила ву? Йа (массо) хIума лелош верг мила ву? Цара эр ду хьуна: АллахI ву; ахь (цаьрга) ала: ткъа (Цунах) кхера ца кхоьру шу?)[1]

(Цуьнан (керахь) ду кхоллар а, болх а; сийлахь-беркате хили АллахI, Iаламийн Эла) [2]

Оцу айаташкахь АллахIа довзуьйту вайна, рицкъа далар а, хазар а, бIаьрса а, адам далийтар–дендар а, кхоллар а Шегахь цхьаьнгахь хилар. Цо довзуьйту вайна, дерриге гIуллакх лелош верг а, стигланий а, лаьттанийн а, Ша кхоьллинчу массо хIуманан а болх Шен керахь хилар, Ша лелош хилар, Шен омрунца и болх хуьлуш хилар.

Цундела, АллахIера цхьа а тешалла а доцуш, беллачу наха дуьненан а, стигланан а белхашна Iаткъам бо боху кхетам а, веллачу стага дийначунна цамгарца а, вочу хIуманца а Iаткъам бо боху кхетам цхьана могIарера бу, цхьа жамI долуш бу, цундела и шиъ ший а мегаш бац.

Ткъа дика хууш верг АллахI ву.