Ассаламу Iалайкум! Олхазар, ламаз т1ехьа деш долу до1а джама1атца дича нийса ду, йа х1ораммо ша-ша дича нийса ду (суннатехь)?

БисмиллахIиррохьманиррохьим

Ва Iалайкум ассалам ва рохьматуллахIи ва баракатухI!  

Ламазал тIаьхьа доIа дар а, и доIа деш ши куьг хьалаайдар а мегаш хилар а, дика хилар а вай дийцира хьалха хIокху шина хаттарехь:

ДоIа деш ши куьг хьалаайдар

Парз ламаз динчул тIаьхьа доIа деш ши куьг хьалаайдар

Ткъа и доIа даран куц Iелам-наха иштта дийцина:

«Суннат ду ламазал тIаьхьа деш долу зикр а, доIа а аз а ца айдеш къайлах дар, цунах лаьцна даьхкина нийса хьадисаш долу дела; ткъа нагахь санна и зикр а, доIа а дан ца хууш нах белахь, имамо чIогIа дийр ду иза, хаза а хезаш, царна Iаммалц, тIаккха царна иза Iеминчул тIаьхьа, къайлах, меллаша дийр ду».[1]

Амма ламазал тIаьхьа ден доIа жамаIатца дар – иза деана дац йа суннатехь а, йа асхьабашкара а, йа церал тIаьхьа хиллачу баккхийчу Iелам-нахера а; иза дика хилар Iелам-наха хьахош гина а дац суна. Муххале а, цхьаболчу Iелам-наха, даим жамаIатца и доIа дар керлаюкъадаьккхина вон хIума (бидIат) лерина, Пайхамаран – АллахIера салават а, салам а хуьлда цунна – заманахь а, цул тIаьхьа асхьабийн заманахь а иза иштта деш хилла доцу дела.[2]

Сийлахь Пайхамара а – АллахIера салават а, салам а хуьлда цунна – цуьнан асхьабаша а ламазал тIаьхьа деш долу зикр а, доIа а хIораммо а ша-ша деш хилла, хьадисашкахь деана ма-дарра, цундела, вай а цара ма-дарра дича нийса хир ду суннатехь, иштта хилча беркате а, ял алсам йолуш а хир ду Дала мукъа лахь.

Ткъа, наггахь, цхьацца хьолехь иза жамаIатца дича хIумма а дуй аьлла хаттар кхолладелча, ала догIу: къаьсттина ламазал тIаьхьа деш долу доIа жамаIатца дар суннат ду аьлла кхетам хир бацахь, йа иштта ду моьттуш иза лелор а дацахь, наггахь цхьана бахьанийна иза жамаIатца дича вон хIумма а ца хила мега, цхьамма доIа а деш, кхечара амин а олуш доIа дар мегаш хилар дуьйцучу хьадисашна тIедоьгIча, делахь а, вай лакхахь ма-аллара, даим иза жамаIатца дар суннат ду мотта мегар дац.

Ткъа дика хуург лекха хинволу АллахI ву!